„ვარლაამის და იოასაფის რომანის“ (CPG 8120) ე.წ. „ლემა“, როგორც პარატექსტი

ანოტაცია

სტატიაში შესწავლილია „ვარლაამისა და იოასაფის რომანის“ (CPG 8120) აღწერითი სათაურების არსებობა, ფუნქცია და შინაარსი. ეს სათაურები განხილულია როგორც პარატექსტული, უფრო ზუსტად კი პერიტექსტული ელემენტები, რომლებიც მაშინ შეიქმნა, როდესაც „რომანი“ უკვე მიმოქცევაში იყო. ისინი განსხვავებულ ცნობებს გვაწვდის ნაწარმოების წარმომავლობის, მისი დასახელებული წარმოშობის ადგილიდან მომტანი პირის, ავტორის ან მთარგმნელის შესახებ. ვასაბუთებთ, რომ ვენეციის Biblioteca Nazionale Marciana-ში დაცულ ხელნაწერში, gr. VII, 26 (coll. 1431), წარმოდგენილი სათაურის ფორმა ასახავს პირველადი პარატექსტის სახეს, რომელიც წიგნად გავრცელებული „რომანის“ უძველესი ვერსიისათვის მომზადდა. იგი შეიცავდა ცნობას როგორც ნაწარმოების მომტანის, ისე მთარგმნელის შესახებ, მაშინ როდესაც სათაურები, რომლებიც მხოლოდ „რომანის“ მომტანს ასახელებს, შესაძლოა სხვა სარედაქციო პროექტისათვის შექმნილ მეორეულ პარატექსტს წარმოადგენდეს და ქრონოლოგიურად პირველადი პარატექსტისაგან სულაც არ იყოს დიდად დაშორებული.