ჟურნალ ქართული წყაროთმცოდნეობის XXVI ნომრის პრეზენტაცია

ანოტაცია

2025 წლის 21 მარტს ივანე ჯავახიშვილის სახელობის თბილისის სახელმწიფო უნივერსიტეტის ისტორიისა და ეთნოლოგიის ინსტიტუტში გაიმართა სამეცნიერო ჟურნალ „ქართული წყაროთმცოდნეობის“ XXVI ნომრის პრეზენტაცია. ღონისძიებამ გააერთიანა მეცნიერები, სტუდენტები და აკადემიური დაწესებულებების წარმომადგენლები. ჟურნალის თანარედაქტორმა, პროფესორმა მარიამ ჩხარტიშვილმა, შეხვედრა ჟურნალის განვითარების, მიღწევებისა და მიმდინარე გამოწვევების მიმოხილვით გახსნა. შემდეგ დოქტორმა ვალერი ვაშაკიძემ ისაუბრა ჟურნალის აკადემიურ რეპუტაციასა და ERIH PLUS-ის მონაცემთა ბაზაში მის ინდექსირებაზე. თანარედაქტორმა ზურაბ თარგამაძემ ახალი ნომრის შინაარსი წარადგინა და განსაკუთრებული ყურადღება მნიშვნელოვან კვლევებს, ახლად გამოქვეყნებულ თარგმანებსა და ფასეულ საარქივო მასალებს დაუთმო. სარედაქციო კოლეგიის წევრმა სოფიო ქადაგიშვილმა ჟურნალის თემატური განყოფილებების მნიშვნელობასა და ქართულ ისტორიოგრაფიაში მათ წვლილზე ისაუბრა. ერთ-ერთი მთავარი სიახლე იყო ჟურნალის CrossRef-თან ინტეგრაცია, რაც თითოეულ გამოქვეყნებულ სტატიას DOI-ს (Digital Object Identifier) მინიჭების შესაძლებლობას აძლევს და გამოცემის საერთაშორისო ხილვადობასა და ხელმისაწვდომობას ზრდის. ღონისძიება დასრულდა ახალი ნომრის დარიგებით, ბრენდირებული მასალების წარდგენითა და ციფრული ვერსიის გაცნობით. შემდეგ დამსწრეები სარედაქციო გუნდის მიერ ორგანიზებულ არაფორმალურ მიღებაზე შეიკრიბნენ.